In die skroewe met Riaan Gerber

In gesprek met Johan Carinus

Die Carinus-familie het baie noue bande met die Stellenbosch GholfKlub. 

Een van Stellenbosch se groot wynboere en ’n man wat die Stellenbosch-kiesafdeling lank in die destydse Provinsiale Raad verteenwoordig het, Piet Carinus, was vir jare ’n lid van die gholfklub. Sy twee seuns Johan en Pietie kom ook al lank saam met die Stellenbosch Golf Klub.

In vandeesweek se rubriek gesels ek met Johan wat in die wynwêreld asook sportwêreld naam gemaak het.  Hierso volg my onderhoud met hom:


VRAAG:  Wat was jou bekendstelling van die Stellenbosch-gholfbaan?

CARINUS:  My pa Piet was ’n geesdrifige gholfspeler en as jong seun het ek Saterdae saam met hom na die baan gegaan en sy karretjie getrek.

VRAAG:  Jou Pa Piet was 'n groot gees by die Gholfklub – vertel ons ’n bietjie meer van hom?

CARINUS:  My pa het eers tennis gespeel by die Vlottenburg, maar in daardie tyd was omtrent net boere lid van die tennisklub.  Hy het gesê hy werk heeldag met die boere saam, maar wil begin om ’n sport te speel saam met ook ander ouens uit die gemeenskap en het toe begin om gholf te speel.  Hy was ’n baie lojale klublid en het gereeld saam met sy werkers na die Stellenbosse gholfbaan gegaan om te help met die instandhouding van die baan.

VRAAG:  Het jy ooit op skool begin om gholf te speel?

CARINUS:  Rugby en krieket het my besig gehou op skool, maar ek en Johann Rupert het baie gereeld op Vrydae by die gholfklub gaan speel.


VRAAG:  Jy was 'n man wat groot naam gemaak het as rugbyspeler by Van der Stel en jou akkurate skopskoen het vir Van der Stel baie wedstryde gewen.  Dit was sekerlik lekker dae.....

CARINUS:  Ja, dit was wonderlike dae en Van der Stel was sterk en ons het in die Groot Uitdaagbeker-liga gespeel.  ’n Hoogtepunt was toe ons in 1972 vir die Maties (met heelwat Springbokke in hul span) op Bergzicht met 4-3 geklop het.  Daardie aand is daar tot laat fees gevier by Bergzicht!  Die wendrie vir ons is  gedruk deur Jannie Breytenbach, stut.  Jannie kan jy noem ’n Springbok sonder kleure, want hy is vir alle SA spanne gekies, buiten vir die Bokke.  Van die ander manne wat saam met my by Van der Stel in daardie jare gespeel het was Johann Gerber, Daantjie Esterhuyse, Arthur Stevens, Boet Waldeck en George van der Westhuizen. Ek het ook nogals ’n rekord opgestel deurdat ek in 12 posisies vir Van der Stel se eerste span gespeel het – al posisies wat ek nie gespeel het nie, was haker, skrumskakel en losskakel.  Ek het ook my loopbaan by Van der Stel begin op nommer 15 en geëindig op nommer 1!   Wat die skopwerk betref – ja dit was nogals moeilik, want in daardie dae het ons die bal skuins gestel en reguit deur-geskop!


VRAAG: Na jou spelersdae verby was, het jy begin om op te tree as skeidsregter en jy het baie vinnig gevorder.  Wat het jy as skeidsregter geniet?

CARINUS:  Ek het my rug in rugby seergemaak en het daarna begin afrig.  Ek het die tweede span afgerig en ‘n hoogtepunt was die jaar toe Van der Stel die naaswenners was in die tweede liga in die WP – slegs die Maties was voor ons op die punteleer. Maar ek wou nader aan die spel kom en het toe begin om te blaas.  As skeidsregter is jy meer deel van die spel as ’n afrigter (want ’n afrigter staan maar baie kere bekommerd langs die veld wanneer sy span speel...)  Ek het my skeidsregtersdae  baie geniet en was onder die top-10 op die WP-skeidregtersranglys toe ek gedwing was om op te hou blaas weens ’n knaende beenbesering.


VRAAG:  Wanneer het jy begin om meer gereeld gholf te speel?

CARINUS:  Na my skeidsregterdae het ek meer gereeld gholf gespeel – veral gedurende vakansies op Hermanus.  Deesdae speel ek gereeld op Dinsdae in “Sakkie se Groep.”  Ek geniet dit geweldig.  Sakkie reël altyd dat die vierballe - roteer so jy speel altyd saam met ander ouens.  En daarna kuier ons as groep lekker saam in die boonste lokaal en as bonus bring Albie de Waal vir ons altyd van Meerlust se puik wyne!


VRAAG:  Wie is die gevaarlike teenstanders in hierdie gholfgroep?

CARINUS:  Eon Venter is die gevaarlike ene.  Eon is ’n momentum-speler – bedoelende as hy die eerste klompie putjies sukkel, dan is hy nie ’n groot gevaar nie.  Maar as hy goed begin, dan is hy ’n uiters gevaarlike teenstander op die gholfbaan.


VRAAG: Watter putjie op Stellenbosch vind jy die mees uitdagende?

CARINUS: Die 11de putjie is altyd vir my ’n uitdaging.  Die setperk loop baie skuins van voor na agter en dit is baie moeilik om die bal te stop op hierdie setperk met jou naderhou – veral as die pen voor is.  My tweede hou is gewoonlik so 30 m kort van die setperk en ek vind dan dit uiters uitdagend om die bal te laat stop naby die pen.


VRAAG:  Huidige voorgee?

CARINUS 19


VRAAG:  Laagste voorgee ooit?

CARINUS:  Toe ek 50 jaar oud word, het Fritz Wirth vir my as verjaardag-geskenk ’n pakket gholflesse gegee by Rae Hast (sy het by die Somerset-Wes oefen-fasiliteit afgerig).  Ek was toe ’n 14-voorgee.  Na my lesse het ek vinnig verbeter en was 4 maande daarna ’n 9-voorgee.  Dit was my laagste voorgee ooit.


VRAAG:  Wat beteken gholf as mens vir jou?

CARINUS:  Dis ’n wonderlike spel, want jy kan dit oral speel en saam met ’n wye verskeidenheid van mense.  Gholf leer jou ook baie lewenslesse – insluitende dinge soos etiek asook nederigheid.