Dawie van Emmenis

Dawie van Emmenis het op ‘n laat ouderdom begin gholf speel, maar toe die gholf-gogga hom gebyt het, het hy baie lief begin raak vir hierdie uitdagende spel.  Dawie is ‘n lekker man om mee saam te speel op die gholfbaan, maar hy is ‘n baie gedugte teenstander en op ‘n stadium was hy en sy maat kroonwild by die Stellenbosch-klub.  Hierso is my onderhoud met hom.


VRAAG:  Hoe oud was jy toe jy aan gholf bekend gestel is en hoe het dit gebeur?

VAN EMMENIS:  Ek het so bietjie gholf gespeel saam met my pa toe ek `n student was,  maar die gogga het my eintlik eers gebyt toe ek so 41 jaar oud was. My goeie vriend en eertydse lid, Neels Schutte, het my oorreed om saam met hom te speel.


VRAAG:  Het die gholfgogga vir jou dadelik gebyt? 

VAN EMMENIS: Ja, dit fassineer my altyd as spel omdat dit so uitdagend is. `n Mens kan een 9 so goed speel net om die volgende 9 putjies hard teruggebring word aarde toe. En daardie balletjie lê doodstil – jy moet hom net reguit slaan!


VRAAG:  Was jy by ander gholfklubs as Stellenbosch lid?  

VAN EMMENIS:  Ek het aanvanklik by Strand aangesluit maar na net `n paar maande (en rondes) het ek in 1998 lid by Stellenbosch geword.

VRAAG:  Jy het 'n baie ritmiese en stadige terugswaai met 'n effense "pause" op die top van jou swaai (omtrent net soos Hideki Matsuyama).  Hoe het dit gekom dat jy daardie gholfswaai ontwikkel het? 

VAN EMMENIS:  Ek het dit maar vir myself uitgewerk – dit is my manier om “eers my terugswaai klaar te maak” voordat ek met my deurswaai begin. Ek het so agtergekom dat ek beter ritme het.

VRAAG:  Wat doen jy sodat die tempo van jou gholfswaai nie te vinnig raak nie - veral onder druk-situasies? 

VAN EMMENIS:  Ek konsentreer op die effense “pouse” en om “agter” die bal te bly met die deurswaai.


VRAAG:  As jy terugkyk op jou gholfdeelname - wat is jou hoogtepunte?

VAN EMMENIS:  My groot hoogtepunt was toe ek in 2015 die Boland B-afdeling van die Mercedes-trofeekompetisie op De Zalze gewen het en as prys is ek en my vrou Mauritius toe om aan die finaal te gaan deelneem. Mercedes Benz SA het werklik geen moeite of kostes ontsien om dit baie spesiaal vir ons te maak nie.

VRAAG:  Jy en jou gereelde gholfmaat Wessel Kotze en die res van die vierbal het die afgelope jare baie goed gevaar tydens die Eikestad Classic.  Wat is julle resep? 

VAN EMMENIS:  Ek dink dit is belangrik dat `n span baie goed met mekaar oor die weg moet kom; spanlede moet in staat wees om op hulle eie spel te kan konsentreer, maar moet ook mekaar kan ondersteun - veral as ‘n speler deur ‘n moeilike “patch” gaan of  byvoorbeeld`n kort sethou gemis het .


VRAAG:  Van maats gepraat - wie is jou moeilikste opponente op die gholfbaan en hoekom is hulle sulke moeilike opponente? 

VAN EMMENIS:  Die moeilik om iemand uit te sonder. Die spel self is moeilik genoeg om nog te konsentreer op moeilike opponente!

VRAAG:  Daar word die afgelope tyd baie gemor by die gholfklub oor stadige spel.  Wat is jou waarnemings oor stadige spel by die Stellenbosch-klub?  En het jy voorstelle om die stadige spel aan te spreek? 

VAN EMMENIS:  Ek is van mening dat die gemiddelde ronde nog te lank neem op ons baan omdat spelers nie aanspreeklik gehou word as hulle sonder geldige redes te stadig speel nie.  Ek dink ons “marshalls” behoort meer sigbaar te wees OP DIE BAAN en dat hulle iets daadwerkliks moet doen as spelers te stadig speel. Dit is alombekend dat daar van ons bekende (prominente) lede wat die groot sondaards hier is. Niks gebeur egter nie.


VRAAG:  Wat is jou opinie oor die baan se kondisie - skoonvelde, setperke en sandkuile? 

VAN EMMENIS:  Die skoonvelde is, gegewe die droogte, in `n goeie toestand en die setperke is tans uitstekend. Die sandkuile? Nou ja...


VRAAG:  Enige baanveranderinge wat jy graag sou wou sien gebeur? 

VAN EMMENIS:  Ek geniet ons baan baie behalwe vir die toestand van die sand(?)kuile.


VRAAG:  Buiten Stellenbosch - wat is jou ander gunsteling-bane? 

VAN EMMENIS:  George GC, Gary Player CC, Leopard Creek.

VRAAG: Laagste bruto telling ooit? 

VAN EMMENIS:  75


VRAAG:  Laagste voorgee ooit?

VAN EMMENIS:  6


VRAAG:  Huidige voorgee?

VAN EMMENIS:  15


VRAAG:  Al 'n kolhou behaal?  

VAN EMMENIS:  Een -  op Stellenbosch se 9de putjie met `n 7-yster vanaf 137m.  Dit was op 27 Junie 2015.


VRAAG:  Wat toerusting betref val die gewone klubgholfspelers in twee "kampe."  Die een groep is ouens wat vir jare met dieselfde stokke speel en baie min van toerusting verander.   Die ander groep is ouens wat gereeld nuwe stokke uitsoek en probeer - alles om beter te speel.  In watter "kamp" is jy? 

VAN EMMENIS: “Once a Ping-man, always a Ping-man” Ek speel tans met slegs die tweede stel stokke wat ek ooit besit het – my eerste stel hou ek nog steeds in Gauteng by `n vriend en speel somtyds daarmee as ek die geleentheid kry om daar `n ronde te speel.


VRAAG:  Het jy enige bygelowe of besondere gewoontes in gholf? 

VAN EMMENIS:  Nee.


VRAAG:  Het jy 'n amusante insident wat op die gholfbaan gebeur het en waarvan jy getuie was, wat jy met ons wil deel?  

VAN EMMENIS:  Ek het `n paar baie snaakse oomblikke meegemaak met my ou maat Wessel, maar sal ter wille van die vriendskap liewer nie op hierdie forum daarop uitbrei nie!

Kom ons praat maar nie oor die tale wat ek Saterdag vir Saterdag moet hoor nie! Of toe `n vorige klubkaptein die dag die aspirasies gehad het om die eerste klubkaptein te word word om die klubkampioenskappe te kan wen, maar die “Markie” die oggend hom gepootjie het! Of toe my maat sy bal wou naderkrap deur die elektriese draad by die sesde gat en “geskok” is dat hy daar op sy sitvlak beland!

Ek noem nie name nie……

Toe ek en Neels Schutte nog jare gelede saamgespeel het voordat hy na Australië  geëmigreer het, het ons so lekker saam gespeel en as `n gedugte span bekend gestaan. Een Woensdag het ons vir Arnold Mentz en sy maat geklop toe kondig hy in die nuusbrief aan hy sit ‘n boks nuwe gholfballe op die spel vir die eerste tweebal wat vir my en Neels kan klop. Nodeloos om te sê - die manne het oor hulle voete geval om teen ons te kan speel. Ek moet sê ons het nogal `n paar weke uitgehou voordat Arnold die balle moes opdok! Ek kan nie eens meer onthou wie het op die ou einde ons geklop nie! Ek en Neels was amper kroonwild vir daardie paar weke!


VRAAG:  Wat beteken gholf vir jou as mens? 

VAN EMMENIS:  Dit laat my ontspan. Dit bring my in die natuur en laat my die natuur opnuut waardeer, veral in die pragtige omgewing waarin ons bly. Dit gee my dinktyd….