Met die Wêreldbeker-toernooi nog pas in ons geheue, gaan ek in my volgende rubriek of wat die fokus plaas op oud-Springbokke wat ook lid is van die Stellenbosch-gholfklub.

Jackie Snyman het vir die Springbokke in 3 toetse gespeel in 1974 teen die sterk span van die Britse Leeus.  Snyman het in hierdie toetsreeks 18 punte behaal met 6 strafdoele.

Snyman wat senter en losskakel gespeel het, is die ouer broer van die Springbok-losskakel en voormalige afrigter van die WP-rugbyspan, Dawie Snyman.

Hierso is my onderhoud met hom:

VRAAG:  Waar was jy op skool?

SNYMAN: Grey Kollege, Bloemfontein.

VRAAG:  As student op Maties het jy onder die beroemde Dok Danie Craven gespeel.  Watter wysheid/raad van Dok Craven het vir jou as rugbyspeler die meeste beteken?

SNYMAN: Dok se raad:  “Luister altyd op die veld na die spelers om jou“ het baie vir my beteken as rugbyspeler.  Ek het saam met voetballers soos Eben Olivier, Jannie Engelbrecht en Ray Carlson vir die Maties gespeel en Dok se raad het van my 'n baie beter speler gemaak.  Deurdat ons agterspelers heeltyd met mekaar gekommunikeer het, het ons altyd probeer om geleenthede vir mekaar te skep.  Ons het baie kere 'n "call" gemaak nadat ons skrumskakel Poenie Holm die bal alreeds aangegee het!  In hedendaagse rugby word die "calls" in die kleedkamer gemaak en in party gevalle selfs 'n maand voor die wedstryd!

VRAAG:  Wat is die verskil tussen toetsrugby en provinsiale (Curriebeker-rugby)?

SNYMAN:  In toetsrugby gebeur alles net baie vinniger.  Jy het minder tyd om besluite te neem.  Jou spasie op die veld is kleiner en jou opponent is beter.

VRAAG:  Watter toets was vir jou die hoogtepunt as Springbok?

Snyman: Die 4de toets teen die Leeus van 1974 was 'n besliste hoogtepunt.  Daardie reeks was vir die Bokke onstuimige tye en daar was baie spanveranderinge.  Toe die 4de toets aangebreek het, het die Bokke darem al hul voete gevind en dinge in die span het gestabiliseer.  Ons het goed gespeel al was die telling net gelykop.

VRAAG:  Wat het die Leeus van 1974 so 'n geweldige sterk span gemaak?

SNYMAN:  Elke speler in die span was 'n speler van gehalte en hul vaardighede was op ‘n baie hoë vlak.  Ook het hulle gevestigde kombinasies gehad - soos die skakelpaar, Phil Bennett en Gareth Edwards.

VRAAG:  Wie was die beste SA senter saam met wie jy ooit gespeel het?

SNYMAN: Joggie Jansen.  Joggie was 'n baie soliede speler en het altyd vir my as sy sentermaat groot vertroue gegee.  Hoewel Joggie dalk allerweë onthou sal word vir sy onverskrokke verdediging, was hy 'n baie goeie aanvaller en het baie hard aan sy aanvallende spel gewerk.

VRAAG:  Die Bokke is baie gekritiseer vir hul spelpatroon tydens vanjaar se Wêreldbekertoernooi.  Wat meen jy het hulle anders gedoen in die finaal om Engeland so oortuigend te kon klop?

SNYMAN:  Die Bokke het nie juis baie anders gespeel in die finaal nie, maar wat hulle gedoen het op die veld het hulle met groot vertroue, presiesheid asook met geweldige fisiekheid uitgevoer. Soos die wedstryd gevorder het, het die Bokke duidelik al hoe meer selfvertroue geopenbaar, terwyl hulle Engeland al hoe meer op die agtervoete gehou het.

VRAAG:  Jyself was ‘n akkurate stelskopper in rugby – is daar ooreenkomste tussen stelskopwerk en die gholfswaai?

SNYMAN:   Ja, daar is 'n hele paar raakpunte - balans, ritme, oog op die bal.  En natuurlik net soos gholf is sekerlik die belangrikste om te oefen, te oefen en nogmaals te oefen.

VRAAG:  Nadat jy by ‘n mynbou-maatskappy gewerk het, het jy op gevorderde ouderdom besluit om ‘n PGA professionele afrigter te raak.  Wat was die rede vir daardie besluit?

SNYMAN: Sport is ’n groot deel van my DNA en na my rugbyjare het ek 'n groot liefde ontwikkel vir gholf.  Ek het opgemerk dat daar by die Potchefstroom-gholfklub 'n groot behoefte was vir iemand om afrigting te gee aan die jong spelers en toe besluit om my PGA-kwalifikasie te verwerf en by die klub te begin werk.

VRAAG:  Het jy jou jare geniet as PGA-afrigter by die Potchefstroom-gholfklub?

SNYMAN:  Geweldig baie! Ek hou baie daarvan om met jong mense te werk.  Toe ek by die Tukkies se sportkantoor gewerk het, het ek baie te doen gekry met die studente en die interaksie was vir my baie lekker.  In my jare op Potchefstroom het ek dit geweldig geniet om veral die jong klomp te help met hul gholf.  Iets anders wat gholfafrigting vir my so bevredigend maak is, dat wanneer iemand na jou kom vir 'n les het hy/sy 'n besliste doelwit om te verbeter.  Dit is altyd lekker om te werk met mense wat 'n positiewe doel nastreef.

VRAAG:  Jy is tans betrokke by die gholfoefenbof in Somerset-Wes en jy het al duisende gholfspelers gesien wat daar oefen.  Wat meen jy is die mees algemene fout wat gholfspelers maak wat oefen?   En waarop behoort hulle eerder te konsentreer?

SNYMAN:  Die een ding wat ek aanhoudend opmerk is dat die mense wat oefen hul bolyf heeltemal te veel en onnodig beweeg.  Dit gaan op en af of heen en weer. Waarop hul eerder moet konsentreer is die rotasie van die skouers.

VRAAG:  Jy was eers lid by die Strand-klub maar het ‘n paar jaar gelede by Stellenbosch aangesluit.  Wat is die kenmerke van die Stellenbosch-baan wat vir jou aantrek en die spel genotvol maak?

SNYMAN:  Een van die dinge wat my aantrek tot die Stellenbosch-baan is deurdat die kondisionering van die baan so uitstekend is.  Vir omtrent 90% van die jaar is die baan-kondisie puik.  Ook is ek baie beindruk met die manier hoe die administratiewe gedeelte van die klub bestuur word.  Die klub-personeel tree baie professioneel op.

VRAAG:  Watter putjie meen jy is Stellenbosch se sterkste putjie?

SNYMAN:  Die 4de putjie is waarskynlik die mees uitdagende putjie op die baan - veral as die pen regs agter geplaas word.  Die skoonveld is opdraende en dis ook 'n nou skoonveld.  So jy het 'n langerige hou in na die setperk en die pen is werklik weggesteek wanneer dit regs agter geplaas is.

VRAAG:  Jy het die afgelope paar jaar vir die Boland se Super Senior span gespeel met groot sukses.  Wat is jou formule om suksesvol in putjiespel-wedstryde te wees?

SNYMAN:  My resesp is om altyd die bal in die spel te hou.  As ek dit doen is ek altyd 'n faktor in my wedstryd.

VRAAG:  Laagste telling ooit?

SNYMAN:  66 op Royal Johannesburg

VRAAG:  Wat beteken gholf as mens vir jou?

Snyman: Die gholfswaai is vir my 'n absolute tegniese uitdaging om te probeer bemeester.  Verder geniet ek die sosiale deel van gholf baie.  En natuurlik gee gholf se voorgee-stelsel vir 'n enige speler die geleentheid om teen almal te kan kompeteer.