In die skroewe met Pietie Carinus

Die Carinus-familie stap ‘n baie lang pad saam met die Stellenbosch-gholfklub. Pietie Carinus het jare gelede by sy pa, Piet, geleer om gholf te speel en vandag nog is Pietie ‘n baie gedugte speler in klubkompetisies.  Pietie, ‘n baie nederige en vriendelike man, was ook vir jare ‘n staatmaker-ligaspeler.


Hierso volg my onderhoud met hom.


VRAAG:  Hoe oud was jy toe jy begin gholf speel het?

CARINUS:  Toe ek 10 jaar oud was, het ek begin om op die gholfbaan my pa se karretjie te trek wanneer hy Saterdagmiddag gespeel het.  Wanneer my pa en sy vriende na die tyd in die kroeg drankies geniet het, het ek en van my pelle gou 9 putjies gaan speel.


VRAAG: Wat is die grootste gholflesse wat jy by jou pa geleer het?

CARINUS:  Hy het my geleer dat gholf jou nederig hou en dat jy nie moet verwag dat jy elke keer 'n goeie ronde gaan speel nie.


VRAAG:  Saam met watter ander juniors het jy begin gholf speel? 

CARINUS:  Ek het saam met ouens soos Charl Bergh, Egmont Sippel, Jan Maartens en Nols Heunis gespeel - dit was gewoonlik Saterdagmiddae wanneer ons klaar "ge-caddy" het.  Toe ek 13 jaar oud was het ek ophou gholf speel, want die krieket en rugby het my oor naweke besig gehou.



VRAAG:   Wanneer het jy aangesluit by die Stellenbosch-gholfklub?

CARINUS:  Ek was van 1965 tot 1967 'n skoliere-lid en het in 1986 'n vollid geword.


VRAAG:  Jy het vir baie jare Brodieliga gholf gespeel?  Watter hoogtepunte staan uit tov jou ligajare?  

CARINUS:  Ek het Brodieliga gespeel vanaf 1989 tot 2014.  Ek was bevoorreg om twee keer in die Brodie-eindstryd te kon speel en is ook twee keer aangewys as die klub se Brodieliga-speler van die Jaar.


VRAAG:   Watter opponent-klubs was gewoonlik moeilike teenstanders in die Brodieliga?

CARINUS:  Kuilsrivier was altyd baie moeilike opponente en die gevoel was dat die Kuilsrivier-manne se voorgee altyd te hoog was.  Stellenbosch het al die jare twee spanne in die Brodieliga gehad en wanneer die twee Stellenbosse spanne kragte gemeet het, het dit gevoel soos 'n toets.


VRAAG:  In die begin van jou gholfjare het jy geleer om vanaf ‘n “fade die” bal te haak.  Wat was jou wenk dat jy die bal kon haak – dws waarop het jy gekonsentreer om die hakie te slaan?

CARINUS:  Ek het maar net geleer om met my arms heeltemal deur te swaai en nie te stop nie - as jy dit doen dan haak jy die bal outomaties.


VRAAG:  Jy het jare met Hogan blades ysters gespeel – was dit groot gunsteling-stokke by jou?

CARINUS:  Ja, my eerste stel  het ek in 1987 gekoop en ek speel tans maar met my derde stel stokke ooit.


VRAAG: Jy het ook goed gevaar die afgelope jare in die Winter Uitklopkompetisie – wat was jou hoogtepunt in hierdie kompetisie?

CARINUS:  Die hoogtepunt was in 1988 toe ek vir Carel Nel in die eindstryd van die Winter Uitklop-kompetisie geklop het - daarna het Carel my sommer ook gekies vir die Brodiespan!


VRAAG:  Jy en jou seun Pieter het ook ‘n keer of wat die Ouer en Kind Kompetisie gewen.  Dit moes baie lekker gewees het – vertel ons meer daarvan en hoe jy dit geniet om saam met jou seun te speel?

CARINUS:  Ek en my pa het die kompetisie in 1998 gewen en daarna het ek en my seun Pieter in 2004 dit gewen.  Dit is 'n voorreg om saam met jou seun te kan spel - net jammer hy speel so min gholf.


VRAAG:  Wie was jou moeilikste opponente deur die jare op die Stellenbosch-gholfbaan?

CARINUS:  Carel Nel en Gerrie Jonas is moeilike opponente.


VRAAG:  Jy foeter die bal en steur jou nie baie aan balans nie – was dit maar altyd so vanaf jy begin gholf speel het?

CARINUS:  Ja, almal dink ek gaan omval as ek die bal slaan - maar dis hoe ek speel.


VRAAG:  Wat is jou laagste telling wat jy nog ooit op Stellenbosch gespeel het?

CARINUS:  70


VRAAG:  Huidige voorgee?

CARINUS:  9


VRAAG:  Laagste voorgee ooit?

CARINUS:  5


VRAAG:  Wat is jou gunsteling wyne op die dranklys by die klub?

CARINUS:  Kowie du Toit se wit en rooi. Kleine Zalze Chenin Blanc en Stellenbosch Hills Chenin Blanc.


VRAAG:  Hoe kry jy dit reg om so gereeld goed te vaar in klubkompetisies?

CARINUS:  Ek is gelukkig dat ek somtyds saam met 'n goeie maat speel.


VRAAG:  Wat is jou ander gunsteling gholfbane?

CARINUS:  Hermanus is 'n ander baan waarvan ek baie hou.


VRAAG:  Wat is lekker van gholf vir jou en wat beteken gholf vir jou as mens?

CARINUS:  Dit is baie aangenaam om saam met lekker mense gholf te speel en dit laat jou vergeet van al die moeilikhede by die werk.  Dit is ook vir my baie lekker om 'n paar wyne by die 19de putjie saam met die manne te geniet.