In die skroewe met Willem Malherbe



Willem Malherbe is een van die groot karakters by die Stellenbosch-gholfklub.  Altyd gereed met 'n pittige opmerking en altyd baie positief op die baan as speler - hetsy as jou maat of jou teenstander.  Hierso volg my onderhoud met hom.


VRAAG:  As leerling by Paul Roos het jy rugby en krieket gespeel, maar het jy ooit gholf op skool gespeel?

MALHERBE:  Ek is nie presies seker wanneer ek begin het om gholf te speel nie, maar dit was in in my laaste jare op Maties of toe ek begin werk het.


VRAAG:  In jou beginjare as gholf het jy nogals 'n moeilike besluit gehad, want jy moes besluit of jy links of regs gaan speel.  Soos ek kan onthou, was jy ewe behendig as regshandige speler as 'n linkshandige speler.  Hoe het dit gekom dat jy besluit het om links te speel?

MALHERBE:  Toe ek begin gholf speel het, was linkshandige stokke baie skaars. Die kranige krieketspeler, Daniel du Toit, het by my gebly en hy het op ‘n kol 2 of 3 links-stokke in die hande gekry - as ek reg onthou ‘n 4-yster, 7-yster en 'n  9-yster. Daniel het regs afgeslaan en dan verder links gespeel! Hy het toe later besluit om ‘n links-stel te koop en ek het toe die 3 hotklou-stokke "ge-erf" en later toe ook heeltemal oorgeskakel na links.

VRAAG:  Was dit in daardie jare nie baie moeilik om geskikte links-stokke in die hande te kry nie? 

MALHERBE:  Ja - hotklou-stokke was in daardie jare baie skaars. Vandag het ons darem 'n effens groter keuse, maar daar word steeds teen ons as hotkloue gediskrimineer!


VRAAG:  Het jy deur die jare jou stokke gereeld verander of hou  jy maar by jou gunsteling ou stokke?

MALHERBE:  My eerste stel stokke was Mizuno’s wat steeds my gunsteling-stokke is.  Die stel wat ek laaste gekoop het, is ook Mizuno's, maar ongelukkig is daai  magic weg L Hopelik vind ek dit weer!


VRAAG:  Wat was jou gunsteling setstok deur al die jare - en gebruik jy nog steeds die stok?

MALHERBE:  Ek was nog altyd ‘n redelike emosionele gholfer, en ek raak baie beswaard indien ek ‘n kort set mis. Het jare gelede oorgeskakel na die “broomstick”. Gelukkig het ek dit nooit geanker nie en ek gebruik dit steeds.


VRAAG:  Jy is 'n baie kompeterende speler en gee nooit bes nie.  Ook beskik jy oor die eienskap dat jy jou teenstanders  op 'n mooi manier "uit die game kan praat."   Waar (en by wie) het jy hierdie tawwe mentaliteit as gholfspeler geleer? 

MALHERBE:  Ek het maar nog altyd van 'n bietjie “banter” gehou, maar jy moet bereid kan wees om dit ook te vat as dit na jou kant toe kom.  Normaalweg sal ek nie iemand “chirp” met wie ek nie goed oor die weg kom nie!


VRAAG:  Jy is nie net kompeterend op die baan nie, maar is ook 'n baie positiewe speler en maat - is dit een van die redes hoekom jy so suksesvol deur die jare was tydens groot gholfdae met jou spanmaats?

MALHERBE:  Ja - ek was nog my hele lewe lank kompeterend, maar ek is op die oomblik in ‘n “slump”, en ek hoop ek kom daaruit, anders kan jy moontlik eersdaags ‘n nuwe stel Mizuno’s vir ‘n groot “bargain” optel J Oor die jare het ons van tyd tot tyd goed gedoen in groot toernooie -  ek glo dit was ‘n kombinasie van geluk, samestelling van die voorgeë en determinasie !


VRAAG:  Jou vrou Leonie speel gereeld saam met jou en julle vaar gewoonlik baie goed saam!  Deel met ons die ervaring om gereeld gholf te speel saam met jou vrou.

MALHERBE:  Ja - ons speel gereeld saam in ‘n 4-bal en ek geniet dit baie. Ons het al ‘n keer of wat gewen,maar gewoonlik as die een kook  op die gholfbaan, speel die ander een vrot. Ek dink dit is ‘n groot vooreg om as man-en-vrou sport saam te kan beoefen waarvoor beide lief is.


VRAAG:  Leonie het al teenoor my opgemerk dat jy 'n "gebore coach" is en dat jy konstant raad gee op die baan.  Is dit maar deel van jou DNA as gholfspeler?

MALHERBE:  Dit is seker maar deel van my natuur. Sal altyd probeer help as ek iets sien wat nie so lekker is nie, maar oordoen dit somtyds. Ek wil darem glo ek begin die “coaching” minder doen!J


VRAAG:  Wanneer het jy aangesluit by die Stellenbosch-klub?

MALHERBE: Nie 100 % seker nie, maar iewers in die vroeë 80’s.


VRAAG:  Jy het 'n puik besluit jare gelede geneem om 'n lewenslid van die gholfklub te word - verfris ons geheue asseblief oor hoe dit gebeur het?

MALHERBE:  As iemand wat my hele lewe in die finansiële industrie werksaam was, was hierdie besluit seer sekerlik een van my beste beleggings-besluite. Ek kan nie meer presies onthou wat die beweegrede van die klub op daardie stadium was nie, maar hulle het kontant benodig en hulle het op daardie stadium aan vollede wat 2 jaar of langer lid was die opsie gegee om eenmalig 10 jaar se “subs” vooruit te betaal en dan word jy ‘n lewenslid. Ek onthou nog goed dat die subs R200 per jaar was en sou opgaan na R350 per jaar. Uiteraard was die R2 000 wat ek neergesit het nie ‘n slegte besluit nie! ( Moet darem net byvoeg dat R2 000  op daardie stadium 'n bietjie meer is as vandag!)


VRAAG:  Wat is Stellenbosch-gholfbaan se beste putjie?

MALHERBE:  Ek hou baie van die 5de putjie. Persoonlik voel ek dat die Stellenbosch-gholfbaan as ‘n “package” ‘n wonderlike ervaring is wat jou uiteraard ook toets.


VRAAG:  Wat is jou opinie oor die kondisie van die Stellenbosch-gholfbaan (setperke, skoonvelde en sandkuile)?

MALHERBE:  Ek kan die gholfklub se bestuur asook baanpersoneel net komplimenteer oor die kondisie van die baan in seker die moeilikste klimaat-omstandighede wat ek nog ervaar het in al my jare by die klub. Jy weet ek het ‘n “bee in my bonnet” oor die sandkuile. Ek is baie bly hulle is besig om daaraan aandag te gee en daar is alreeds ‘n groot verbetering in my opinie. Ek glo steeds dat die langtermyn oplossing stelselmatig geimplimenteer moet word ! Luister Rudi J

  

VRAAG:  In jou lang gholfloopbaan moes daar sekerlik talle amusante insidente  gewees het wat jy beleef het.  Kan jy 'n insident of twee met ons as lesers deel?

MALHERBE:  Daar is baie, maar een wat dadelik by my opkom was toe ons eendag op die 10 de putjie was en daar kom ‘n ou op 'n motorfiets in Strandweg wat teen ‘n verskriklike spoed verbygejaag.  Hansie van Niekerk maak toe rustig die opmerking:  "Stuur sommer groete aan Dok ook! ( bedoelende as die motorfietsjaer 'n ongeluk sou maak en lang bome toe gaan, moet hy vir Dok Craven gaan hallo sê). ‘n Ander storie wat nie soseer ‘n insident is nie,maar net vir jou wys dat jy nie groter as die spel is nie, was toe ek en Daniel du Toit een Woensdagmiddag met 53 stableford-punte  die kompetisie lag-lag wen!  Die volgende Saterdagoggend vroeg tree ons weer aan in ideale gholf-kondisies en ons wonder tussen ons twee  wie vandag tweede na ons  gaan kom ? Nodeloos om te sê - ek en Daniel het gesukkel om 35 punte bymekaar te skraap !


VRAAG:  Laagste voorgee ooit?

MALHERBE:  Vir 3 maande ‘n 7-voorgee. Het dit gehaat, want met my talent moet jy oefen om daardie voorgee in stand te hou en ek oefen slegs in ‘n noodgeval!


VRAAG:  Huidige voorgee?

MALHERBE:  Nou ‘n 15 geword, maar soos reeds genoem het - ek sukkel !!


VRAAG:  Al 'n kolhou behaal?

MALHERBE:  Ja, ek het al op die ou 9de een gehad. Ironies het ek toe nog by Sanlam gewerk en dit was tydens ‘n Old Mutual gholfdag.


VRAAG:  Buiten Stellenbosch - wat is jou ander gunsteling-gholfbane? 

MALHERBE:  Ek dink ons is baie bevoorreg in die Wes-Kaap met uitstekende bane in die omgewing. Persoonlik hou ek baie van Hermanus.


VRAAG:  As 'n ou Stellenbosser geniet jy 'n glasie lekker wyn.  Watter wyne van die klub is volgens jou lekker wyne en bied ook goeie waarde vir geld?

MALHERBE:  Ongelukkig drink ek so baie wyn - ek kan nie bekostig om my vriende se duur wyne die heeltyd te drink nie - wel per geleentheid . As ‘n rooiwyn-drinker dink ek Kowie se wyn bied uitstekende waarde.


VRAAG:  Wat beteken gholf as mens vir jou?

MALHERBE:  Dit is seker al ‘n cliché , maar gholf is “the greatest leveller”.  Dit hou 'n mens “humble”, maar dit is ook wonderlik om gedurende 'n gholfronde deel van die natuur te wees en dit te kan ervaar.  Om dan ook nou en dan 'n goeie ronde te kan speel is verder 'n bonus!