Piet Theron

As ‘n plaasseun in die Piketberg-distrik het die jong Piet Theron ‘n stel ou gholfstokke in sy pa se studeerkamer ontdek en saam met sy maats ‘n gholfbaantjie op die plaas uitgelê.  Die gholfgogga het hom gebyt, maar weens ‘n besige werkskedule kon hy deur die jare nie baie gholf speel nie.  Die laaste jare het hy egter vinnig ingehaal en is iemand wat vandag kan sê hy het al die top 100-gholfbane in Suid-Afrika al gespeel.  Hierso volg my onderhoud met hom.

VRAAG:  Hoe het dit gekom dat jy met gholf kennis gemaak het - en hoe oud was jy? 

THERON:  Toe Gary Player in 1965 die VSA Ope gewen het, was ek 12 jaar oud en in daardie jaar het ek  'n stel ou Hickory Wood Shaft (Blades) stokke in my pa se studeerkamer op die plaas ontdek. Toe lê ek 4 putjies om ons plaashuis aan (tussen 30 en 50 meter) in die sand en harde grond. 'n Paar van ons begin toe met 1 stok per persoon 'n tipe "chip en putt" kompetisie daar speel; 4 putjies kloksgewys en 4 anti-kloksgewys. My beste telling was <20 (die gate het later baie groot geword!) 

VRAAG:  Het die gholfgogga jou dadelik gebyt? 

THERON:  Op die platteland  waar ek groot geword het (Piketberg) is kinders nie aangemoedig om gholf te speel nie. Die spelery op die plaas was egter groot pret.

VRAAG:  By watter klub was jy vir die eerste keer 'n lid? 


THERON:  By Old Mutual in Pinelands se 9 putjie Mashie Course (1976). My eerste volwaardige klub was Randpark in Johannesburg (1983) waar Cobie le Grange die "PGA Professional" was.

VRAAG:  Buiten Stellenbosch - by watter ander klubs was jy ook lid? 

THERON:  Randpark, Rondebosch, George, Lusaka (Zambia).

VRAAG:  Van wanneer af is jy lid by die Stellenbosch-gholfklub? 

THERON: 2014

VRAAG:  Jy was onlangs in die nuus toe jy dit reggekry het om al 100 van Golf Digest se top-bane te kon speel.  Die volgende vrae handel daaroor:

VRAAG:  Wat was die eerste baan van die top-100 wat jy gespeel het?

THERON: George.


VRAAG:  Het jy vanaf die begin wat jy op verskillende bane begin speel het rekord gehou van die (a) datum;  (b) jou telling en (c) saam met wie jy gespeel het? 

THERON:  Nee, nie van almal nie, maar ek het meer as 50 telkaarte van die bane wat ek die afgelope klompie jare gespeel het, asook heelwat bane in Botswana, Zimbabwe en Zambia wat ek reeds gespeel het en in Skotland. Ek koop ook 'n magnetiese bal-merker van elke klub waar ek speel en plaas dit op 'n kaart in my studeerkamer. Ek het 90 bane van Suid-Afrika se merkers.    


VRAAG:  Het jy die rekords/aantekening gehou in in 'n spesiale boekie?

THERON:  Ek hou geruime tyd reeds 'n Excel Spreadsheet by waarop ek die Top 100 bane opdateer sodra 'n nuwe "rating" uitkom. Ek het dan die bane ge-"tick" wat ek al gespeel het en die bane wat ek nog moes speel ge-"highlight". Toe ek verlede jaar in April afgetree het, het ek 12 bane "gekort" en derhalwe 'n toer aangepak om spesiaal hierdie bane te gaan speel.


VRAAG:  Saam met watter vriend(e) het jy die meeste saam gespeel op hierdie bane? 

THERON:  My seun Pieter en sy skoonpa, Garth Harrison, wat beide in Johannesburg woon en lede is by Ruimsig (Roodepoort). Pieter het baie moeite gedoen om my na bane in Gauteng-omgewing te neem wanneer ek hom uit Lusaka, waar ek van 2003 tot 2014 gebly het, besoek het.


VRAAG:  As jy nou die top 100-bane beoordeel wat is jou antwoorde op die volgende:

Watter 5 bane het jy beskou as die moeilikste?

THERON:  Fancourt Links, Leopard Creek, Sun City (Gary Player), Fancourt Montagu, St Francis Links.


VRAAG:  Watter  5 bane het jy beskou as die mooiste? 

THERON:  Fancourt Outeniqua, Umdoni Park, Pinnacle Point, Highland Gate (Dullstroom), Katberg


VRAAG:  Watter 5 bane se setperke was die vinnigste? 

THERON:  Leopard Creek, Sun City (Gary Player), Fancourt (Links), Glendower, Houghton 


VRAAG:  Watter 5 bane se algehele ervaring het jy as die beste beskou? 

THERON:  Highland Gate (Dullstroom), Champagne Sports Resort (Winterton), Fancourt, Blair Atholl (Johannesburg), Sishen (Kathu)


VRAAG:  Wat was die mees amusante insident wat jy beleef het gedurende jou top 100-bane se speel? 

THERON:  Op Pezula (Knysna) het ek eendag (per ongeluk) my gholfkarretjie 180 grade "ge-spin"; eers my alie af geskrik en toe histeries begin lag. 


VRAAG:  Het jy nog ander doelwitte wat betref die speel van "vreemde/nuwe bane"  Is daar 'n oorsese baan-lysie in jou gedagtes?

THERON:  Stuart McLean, redakteur van Golf Digest, het my uitgedaag om al die 18 putjie-bane in Suid-Afrika te speel. Ek het al baie meer as net die Top 100 bane gespeel, maar moet nog so 'n berekening maak en kyk waar staan ek. Oorsee was die Old Course by St Andrews nommer een op my Bucket List. Ek het dit verlede jaar in Julie gedoen, asook Royal Dornoch (nr. 5 in die wêreld), Gleneagles (Ryder Cup se tuiste in 2014) en Trump Turnberry teen 250 Britse pond (R5,500) per persoon vir 'n ronde - dis malligheid!  Ek sal bitter graag Augusta (tuiste van die US Masters) wou besoek en daar speel!! Dit sal seker maar net 'n droom bly! 


VRAAG:  Wat was jou beroep en kon jy darem deur jou beroep tyd maak vir gholf - of speel jy nou baie meer sedert jy afgetree is?

THERON:  Ek was byna 30 jaar in die Suiwelbedryf, waarvan 11 jaar (2003 - 2014) as besturende direkteur van Parmalat Zambia. Voordat ek formeel in April 2016 afgetree het, was gholf speel 'n taamlike luuksheid. In Lusaka het ek egter feitlik elke Saterdag gespeel. Na my aftrede het ek probeer om al my verlore gholf-speel geleenthede op te maak en het dikwels 4 keer per week gespeel! 


VRAAG:  Hoe vergelyk Stellenbosch-baan met die top 30-bane van Suid-Afrika?  Wat is die groot verskille tussen die top-30 in Suid-Afrika en Stellenbosch?

THERON:  As 'n mens na die Top 20 bane in Suid-Afrika kyk, is my gevoel dat elkeen 'n unieke en eiesoortige tipe gholfervaring bied, hetsy die ligging en/of uitleg is by almal baie interessant. Van nommer 21 tot 30 is ook goeie bane, maar ek glo Stellenbosch (tans nr 73) hoef nie vir hulle terug te staan nie. Ons mikpunt moet wees om in die Top 50 in te beweeg en uiteindelik 'n Top 30 baan te wees.


VRAAG:  Buiten die gehalte van die bane - watter dinge het (vanaf die baan) die meeste indruk by jou gemaak by die top-bane in die land?

THERON:  Die geriewe van die ProShop, kleedkamers tot by die verversingsareas is dikwels in 'n ander klas by hierdie bane. Die Halfweg-huis by Blair Athol (buite op die baan tussen lieflike bome langs 'n waterstroompie) met 'n heerlike "spread" wat deel is van jou speelfooi, moet beleef word om te glo. Leopard Creek se halfweg-"spread" is ook besonders, veral die aanbieding daarvan.  


VRAAG:  Wat meen jy is die Stellenbosch-klub en -baan se sterkpunte?

THERON:  Ons vriendelike personeel en lede se positiewe houding teenoor besoekers of nuwe lede, bly my beindruk. Ons baan se algemene kondisie - veral die setperke, staan vir min van die bane tussen 21 en 72 terug. Die speelbaarheid van ons baan (veral ook vir persone met 'n hoër voorgee) is ons sterkpunt. Jy verloor nie sommer jou bal op ons baan nie!    


VRAAG:  Waaraan kan die Stellenbosch-klub nog werk om die baan te verbeter? 

THERON:  Ek dink die ouens wat die bane beoordeel voel seker ons baan is dalk te maklik vir lae voorgee-spelers. Hulle soek waarskynlik meer "risk & reward" tipe gate en meer "features" (bv. water). Ons baan is redelik konvensioneel uitgelê en is derhalwe nie so interessant soos byvoorbeeld 'n Simola of Zimbali nie.


VRAAG:  Jy het ook vanjaar gespeel in die Honourable Gentlemen Gholfdag by die klub?  Wat is jou indrukke van die gholfdag en spesifiek die beurtspel-formaat?

THERON:  Ek het dit baie geniet, want dit is 'n formaat wat so min (indien ooit) in Klubkompetisies gespeel word. Nie almal gaan noodwendig hierdie formaat geniet nie, maar ons moet nie hierdie unieke dag van ons gholfkalender laat verdwyn nie.


VRAAG:  Jou beste bruto telling ooit? 

THERON:  80 op Oubaai op 28.12.2016.


VRAAG:  Huidige voorgee? 

THERON: 16


VRAAG:  Laagste voorgee ooit? 

THERON: 12


VRAAG:  Wat beteken gholf as mens vir jou? 

THERON:  Gholf is een van die min sportsoorte wat 'n mens se aandag totaal van al die normale goed waarmee jy van dag-tot-dag mag worstel, aflei. Die samesyn en kameraderie met ou en nuwe gholfvriende is ook wonderlik vir my mens-wees.